ഫ്ലാഷ് ന്യൂസ്

....2018-19 വര്‍ഷത്തെ P A C യോഗം 27-09-2018 ന് ഡയറ്റ് മായിപ്പാടിയില്‍ വച്ച് നടന്നു......

Tuesday, 20 August 2013

'മീറ്റ് ദി കാന്‍ഡിഡേറ്റ് '- കാനത്തൂര്‍ യു പിയിലെ പുതുമയാര്‍ന്ന ഇലക്ഷന്‍ മാതൃക

സ്കൂള്‍ ഇലക്ഷന് രണ്ടു ദിവസം മാത്രമേ ബാക്കിയുള്ളൂ. വിവിധ ക്ലാസുകളിലേക്ക് സ്ഥാനാര്‍ഥികളും അനുയായികളും നീങ്ങുകയാണ്. അവസാനഘട്ട പ്രചരണം. സ്ഥാനാര്‍ഥികളുടെ കൈയില്‍ ബാലറ്റ് പേപ്പറിന്റെ  മാതൃകയുണ്ട്. എങ്ങനെ വോട്ട് ചെയ്യണം എന്നാണ് അവര്‍ വിശദീകരിക്കുന്നത്. സീലെവിടെ പതിക്കണം, ശേഷം ബാലറ്റ് പേപ്പര്‍ എങ്ങനെ മടക്കണം തുടങ്ങിയ കാര്യങ്ങള്‍. ക്ലാസിലിരിക്കുന്ന കുട്ടികള്‍ സംശയങ്ങളും ചോദിക്കുന്നുണ്ട്.

കാനത്തൂര്‍ ഗവ. യു പി സ്കളിലെ സ്കൂള്‍ ഇലക്ഷന്‍ പ്രചരണത്തിനിടയിലെ ഒരു സംഭവമാണ് മുകളില്‍ വിവരിച്ചത്. പ്രചരണത്തിനായി കുട്ടികള്‍ വിവിധ മാര്‍ങ്ങളാണ് ഉപയോഗിച്ചത്. തെരുവുനാടകം, പോസ്റ്റര്‍ പ്രചരണം, ദിവസവും വൈകുന്നേരം സ്ഥാനാര്‍ഥിയെയും കൊണ്ടുള്ള ജാഥ, മീറ്റ് ദി കാന്‍ഡിഡേറ്റില്‍ സ്ഥാനാര്‍ഥികള്‍ക്ക് അവരുടെ നയപരിപാടികള്‍ വിശദീകരിക്കാനുള്ള അവസരം.
നാമനിര്‍ദേശ പത്രികാ സമര്‍പ്പണം മുതല്‍ തെരഞ്ഞെടുപ്പ് പ്രഖ്യാപനം വരെയുള്ള എല്ലാ ഘട്ടങ്ങളും പാലിച്ചുകൊണ്ടായിരുന്നു തെരഞ്ഞടുപ്പ്. തെരഞ്ഞെടുപ്പിന്റെ തലേദിവസം ബാലറ്റ് പെട്ടികളും തെരഞ്ഞെടുപ്പു സാമഗ്രികളും സജ്ജീകരിച്ചു - കാരറ്റുകൊണ്ടുള്ള സീലുകള്‍, മഷി, ബാലറ്റ് പേപ്പര്‍... തെരഞ്ഞെടുപ്പ് ദിവസം രാവിലെ 11.30 മുതല്‍ പോളിങ്ങ് സാമഗ്രികള്‍ തെരഞ്ഞെടുപ്പ് ഉദ്യോഗസ്ഥര്‍ വന്ന് ശേഖരിച്ചു. വോട്ടര്‍മാര്‍ക്ക് സ്ലിപ്പുകള്‍ വിതരണം ചെയ്തു. തെരഞ്ഞെടുപ്പ് നിരീക്ഷിക്കാനായി ഉദ്യോഗസ്ഥരുമുണ്ടായിരുന്നു. ക്രമസമാധാനച്ചുമതല പോലീസുകാര്‍ക്കും. ഉച്ചക്ക് മൂന്നു മണിയോടെ തെരഞ്ഞെടുപ്പ് ഫലം പ്രഖ്യാപിച്ചു. വിജയിച്ച സ്ഥാനാര്‍ഥിയെ തോളിലേറ്റി കുട്ടികള്‍ ആഹ്ലാദപ്രകടനം നടത്തി.

 


Monday, 5 August 2013

സംയോജിത മുട്ടകൃഷി !

കഴിഞ്ഞ വര്‍ഷം മൃഗ സംരക്ഷണ വകുപ്പില്‍ നിന്നും ലഭിച്ച 5 കോഴിക്കുഞ്ഞുങ്ങള്‍ മുട്ടയിടാന്‍ തുടങ്ങിയപ്പോഴാണ് മുമ്പത്തെ H.M നാരായണന്‍ മാഷ് പറഞ്ഞത്. “മുട്ട സ്കൂളിലെത്തിച്ചാല്‍ പൈസ തരാം.....”.
അങ്ങനെ സ്കൂളിലെ മുട്ടയുടെ മൊത്തവിതരണം കുട്ടികള്‍ ഏറ്റെടുത്തു
ഇപ്രാവശ്യത്തെ ഹെഡ്മാസ്റ്റര്‍ രാഘവന്‍ മാസ്റ്ററുടെ നേതൃത്വത്തില്‍ അതൊരു വിപുലമായ പദ്ധതിയായി. 
പൗള്‍ട്രി ക്ലബ്ബിന്റെ ചുമതല രാജേഷ് മാഷ് ഏറ്റെടുത്തു. 
പരിപാടിയുടെ ഔപചാരികമായ ഉദ്ഘാടനം  മൃഗഡോക്ടര്‍ സ്മിത സെബാസ്റ്റ്യന്‍ നിര്‍വഹിച്ചു.


സ്കൂളിലേക്കാവശ്യമായ മുട്ട മറ്റ് സ്കൂളുകള്‍ പുറത്തുനിന്നും വാങ്ങുമ്പോള്‍ കാഞ്ഞിപ്പൊയില്‍ ഗവ. യു പി സ്കൂളില്‍ കുട്ടികള്‍ തന്നെ ഉത്പാദിപ്പിക്കുന്നു... മുട്ടയുല്‍പാദനത്തെ സ്കൂളിലെ ഭക്ഷണവുമായി ബന്ധിപ്പിച്ചുകൊണ്ട് കാഞ്ഞിപ്പൊയില്‍ സ്കൂള്‍ വീണ്ടും ചരിത്രം സൃഷ്ടിക്കുന്നു.

Wednesday, 24 July 2013

ആഗസ്റ്റ് മാസം - ലാബ് ശാക്തീകരണമാസം

വാര്‍ഷിക പദ്ധതി രൂപരേഖയുടെ അടിസ്ഥാനത്തില്‍ കാസര്‍ഗോഡ് ജില്ലയിലെ എല്‍ പി, യു പി, ഹൈസ്കൂളുകളില്‍ വിവിധ പ്രവര്‍ത്തനങ്ങള്‍ നടന്നുവരികയാണ്. ജൂലായ് - ആഗസ്റ്റ് മാസങ്ങളിലെ പ്രവര്‍ത്തനങ്ങള്‍ക്ക് അന്തിമരൂപം നല്‍കുന്നതിനുള്ള ഹെഡ് മാസ്റ്റര്‍മാരുടെ ഏകദിന ആസൂത്രണ സംഗമങ്ങള്‍ പൂര്‍ത്തിയായി വരുന്നു. ഇതിന്റെ ഭാഗമായി 'ആഗസ്റ്റ് മാസം - ലാബ് ശാക്തീകരണമാസം' എന്ന നിലയില്‍ സ്കൂളുകളില്‍ പ്രവര്‍ത്തനങ്ങള്‍ ആസൂത്രണം ചെയ്യുന്നതിനുള്ള തീരുമാനങ്ങള്‍ ഉണ്ടായി വരുന്നു. ആഗസ്റ്റ് മാസത്തില്‍ ലാബിന്റെ ക്രമീകരണം മെച്ചപ്പെടുത്താന്‍ സഹായിക്കുന്ന ഒരു കുറിപ്പ് ഹെഡ് മാസ്റ്റര്‍ പരിശീലനത്തില്‍ വിതരണം ചെയ്യുകയുണ്ടായി. പ്രസ്തുത കുറിപ്പ് ആവശ്യമുള്ളവര്‍ക്ക് താഴെ നിന്നും ഡൗണ്‍ലോഡ് ചെയ്യാവുന്നതാണ്.

Monday, 22 July 2013

ഹെഡ് മാസ്റ്റര്‍മാരുടെ ഏകദിന സംഗമം

ജൂലൈ-ആഗസ്റ്റ് മാസങ്ങളിലെ സ്കൂള്‍തല പ്രവര്‍ത്തനങ്ങള്‍ ആസൂത്രണം ചെയ്യുന്നതിനുള്ള പ്രധാനാധ്യാപകരുടെ ഏകദിന ആസൂത്രണസംഗമം വിവിധ സബ് ജില്ലകളില്‍ ആരംഭിച്ചു. ബേക്കല്‍, ഹോസ്ദുര്‍ഗ്, ചിറ്റാരിക്കല്‍ സബി ജില്ലകളിലാണ് ആദ്യമായി പരിശീലനങ്ങള്‍ നടന്നത്. ബേക്കലില്‍ നടന്ന പരിശീലനത്തിന് എ ഇ ഒ രവിവര്‍മന്‍, ഡയറ്റ് ഫാക്കല്‍ട്ടിമാരായ സുബ്രഹ്മണ്യന്‍, വിനോദ്കുമാര്‍ എന്നിവര്‍ നേതൃത്വം നല്‍കി. ഹോസ്ദുര്‍ഗില്‍ ഡയറ്റ് ഫാക്കല്‍ട്ടിമാരായ ജനാര്‍ദനന്‍, രാമചന്ദ്രന്‍ എന്നിവര്‍ ക്ലാസെടുത്തു. ചിറ്റാരിക്കലില്‍ ഡയറ്റ് ഫാക്കല്‍ട്ടിമാരായ കമലാക്ഷന്‍, നാസിര്‍ എന്നിവരും നേതൃത്വം നല്‍കി.


ചെറുവത്തൂര്‍ ഉപജില്ലയിലെ പരിശീലനം 26 ന് നടന്നു. എ ഇ ഒ പ്രകാശന്‍, ഡയറ്റ് സീനിയര്‍ ലക്ചറര്‍ ഡോ. പി വി പുരുഷോത്തമന്‍, ലക്ചറര്‍ പി പി വേണുഗോപാലന്‍എന്നിവര്‍ ക്ലാസുകള്‍ക്ക് നേതൃത്വം നല്‍കി.53 അധ്യാപകര്‍ പങ്കെടുത്തു



Saturday, 13 July 2013

SSLC റിസല്‍ട്ടിനെ കുറിച്ചുള്ള പഠനം ആരംഭിച്ചു

2013 മാര്‍ച്ചിലെ എസ്. എസ്. എല്‍. സി പരീക്ഷയില്‍ കുട്ടികള്‍ പിന്നാക്കം നിന്ന വിഷയങ്ങളില്‍ ഒന്ന് സോഷ്യല്‍ സയന്‍സ് ആണ്. പൊതുവെ എളുപ്പമുള്ള വിഷയമായി കരുതി വന്നിരുന്ന സോഷ്യല്‍ സയന്‍സ് എന്തുകൊണ്ട് വിദ്യാര്‍ഥികള്‍ക്ക് കടുപ്പമേറിയ വിഷയമായി മാറി എന്നത് ഏറെ പഠിക്കപ്പെട്ടിട്ടില്ല. എസ്. എസ്. എല്‍. സി പരീക്ഷയില്‍ കുട്ടികള്‍ ആപേക്ഷികമായി കൂടുതല്‍ തോല്‍വി ഏറ്റുവാങ്ങുന്ന വിഷയമായും സോഷ്യല്‍ സയന്‍സ് മാറിയിയിട്ടുണ്ട്. ഇത് എന്തുകൊണ്ട് എന്നതും അന്വേഷിക്കേണ്ടതുണ്ടെന്ന അഭിപ്രായം പൊതുവില്‍ ഉയര്‍ന്നു വരുന്നുണ്ട്.
ഈ സാഹചര്യത്തിലാണ് കാസര്‍ഗോഡ് ഡയറ്റ് ഇതേക്കുറിച്ച് പഠിക്കാന്‍ തീരുമാനിച്ചത്. പഠനത്തിനാവശ്യമായ ടൂള്‍ നിര്‍മിക്കുന്നതിനുള്ള വര്‍ക്ക് ഷോപ്പ് കാഞ്ഞങ്ങാട് പുതിയകണ്ടം യു. പി. സ്കൂളില്‍ നടന്നു. പതിനഞ്ചോളം ഹൈസ്കൂള്‍ സോഷ്യല്‍ സയന്‍സ് അധ്യാപകരും ഡയറ്റ് ഫാക്കല്‍ട്ടി അംഗങ്ങളും ശില്‍പശാലയില്‍ പങ്കുകൊണ്ടു. പ്രിന്‍സിപ്പല്‍ സി.യം. ബാലകൃഷ്ണന്‍ ആമുഖ അവതരണം നടത്തി. കേവലമായ അഭിപ്രായശേഖരണത്തിനപ്പുറം മതിയായ തെളിവുകളെ അടിസ്ഥാനപ്പെടുത്തിയുള്ള കണ്ടെത്തലുകളാണ് ഉണ്ടാവേണ്ടതെന്ന് അദ്ദേഹം സൂചിപ്പിച്ചു.
ശില്‍പശാലയുടെ പരിഗണനാവിഷയത്തെക്കുറിച്ചും പ്രതീക്ഷിത ലക്ഷ്യത്തെക്കുറിച്ചും ഫാക്കല്‍ട്ടി അംഗം എം. പി. സുബ്രഹ്മണ്യന്‍ സംസാരിച്ചു. ചോദ്യങ്ങള്‍ കൃത്യതപ്പെടുത്തുന്നതിനുള്ള ചര്‍ച്ചകള്‍ക്ക് ഫാക്കല്‍ട്ടി അംഗങ്ങളായ ടി. ആര്‍ ജനാര്‍ദനന്‍, അബ്ദുള്‍ നാസിര്‍, ഡോ. പി. വി. പുരുഷോത്തമന്‍ എന്നിവര്‍ നേതൃത്വം നല്‍കി. പത്മനാഭന്‍, രമേശന്‍ ചേന്തട്ട, പവിത്രന്‍, നാരായണന്‍, മനോജ് കെ മാത്യു, ഗോപാലകൃഷ്ണന്‍, രാജേഷ് കുമാര്‍, തുളസി, സത്യന്‍, മീര, ഷാഹിദാ ബീവി, കൃഷ്ണന്‍, സുജാത, ബിജു ജോസഫ് എന്നീ അധ്യാപകര്‍ പങ്കാളികളായി


Saturday, 15 June 2013

പ്രധാനാധ്യാപക പരിശീലനം

ഡയറ്റിന്റെ നേതൃത്വത്തില്‍ വിവിധ വിദ്യാഭ്യാസ ശാക്തീകരണ പ്രവര്‍ത്തനങ്ങള്‍ നടക്കുന്ന തെരഞ്ഞെടുക്കപ്പെട്ട 30 വിദ്യാലയങ്ങളിലെ പ്രധാനാധ്യാപകരുടെ പ്രത്യേക പരിശീലനം 2013 ജൂണ്‍ 13 ന് ഡയറ്റില്‍ നടന്നു. പ്ലാനിങ്ങ് & മാനേജ്മെന്റ് സീനിയര്‍ ലക്ചറര്‍ കെ. കമലാക്ഷന്‍ പങ്കാളികളെ സ്വാഗതം പറ‌ഞ്ഞു. ഡയറ്റ് പ്രിന്‍സിപ്പല്‍ സി എം ബാലകൃഷ്ണന്‍ ഉദ്ഘാടനം ചെയ്തു.
ഫാക്കല്‍ട്ടി അംഗങ്ങളായ എം പി സുബ്രഹ്മണ്യന്‍, എം വി ഗംഗാധരന്‍ എന്നിവര്‍ സ്കൂള്‍ പ്ലാനിങ്ങിനെ സംബന്ധിച്ച സെഷനുകള്‍ കൈകാര്യം ചെയ്തു. ഏഴാം തരത്തിലെ ശാസ്ത്രം ഐ. ടി അധിഷ്ഠിതമായി പഠിപ്പിക്കുന്നതിന്റെ വിശദാംശങ്ങള്‍ ലാബ് സ്കള്‍ അധ്യാപിക റീത്ത വിവരിച്ചു. തുടര്‍ന്ന് നടന്ന ചര്‍ച്ചയില്‍ കെ. രാധാകൃഷ്ണന്‍, എം വി രാമചന്ദ്രന്‍, മധു കെ, ജി സുബ്രഹ്മണ്യഭട്ട്, പി വി പ്രഭാകരന്‍, രാജീവന്‍ പി എന്നീ പ്രധാനാധ്യാപകര്‍ സജീവമായി പങ്കെടുത്തു

Saturday, 1 June 2013

സ്ക്രീനിങ്ങ് ടെസ്റ്റ് റിസല്‍ട്ട്

കാസര്‍ഗോഡ് ജില്ലയില്‍ കഴിഞ്ഞ വര്‍ഷം ഏഴാം തരത്തില്‍ പഠിച്ചിരുന്ന കുട്ടികളിലെ പ്രതിഭകളെ കണ്ടെത്താന്‍ നടത്തിയ സ്ക്രീനിങ്ങ് ടെസ്റ്റിലെ വിജയികളുടെ പേരുവിവരം ഔദ്യോഗികമായി പ്രഖ്യാപിക്കുകയാണ്. ഓരോ വിദ്യാഭ്യാസജില്ലയില്‍ നിന്നും 20 കുട്ടികളെ വീതമാണ് വിജയികളായി തെരഞ്ഞെടുത്തിട്ടുള്ളത്. യു. എസ്. എസ് പരീക്ഷയിലെ മാര്‍ക്കിനൊപ്പം സ്ക്രീനിങ്ങ് ടെസ്റ്റിലെ മാര്‍ക്കുകൂടി ചേര്‍ത്താണ് പ്രതിഭകളെ തെരഞ്ഞെടുത്തിരിക്കുന്നത്. പകുതിപ്പേര്‍ ഇതില്‍ പെണ്‍കുട്ടികളാണ്. കൂടാതെ ST, SC വിഭാഗത്തിലും CWSN വിഭാഗത്തിലും പെട്ട കുട്ടികള്‍ക്കുള്ള പ്രത്യേക പരിഗണനകളും ഉള്‍ക്കൊള്ളിച്ചാണ് പരീക്ഷാഭവനില്‍ നിന്നും അന്തിമലിസ്റ്റ് തയ്യാറാക്കിയിരിക്കുന്നത്. ഓരോ വിദ്യാഭ്യാസജില്ലയിലെയും റിസല്‍ട്ടിന് താഴെ ക്ലിക്ക് ചെയ്യുക