FINISHING TOUCH - പത്താം തരം ഇംഗ്ലീഷ് പഠനസഹായി

പത്താം തരം പരീക്ഷയെഴുതുന്ന കുട്ടികള്‍ ഏറെ ഭയപ്പാടോടെയാകം ഇംഗ്ലീഷ് പരീക്ഷയെ കുറിച്ച് ചിന്തിക്കുന്നത്. അവര്‍ക്കിതാ മികച്ച ഒരു പഠനസഹായി.
സര്‍ക്കാര്‍ സ്ഥാപനമായ സ്റ്റേറ്റ് ഇന്‍സ്റ്റിറ്റ്യൂട്ട് ഓഫ് ഇംഗ്ലീഷ്, വിദഗ്ധരായ അധ്യാപകരുടെ സഹായത്തോടെ തയ്യാറാക്കിയ ഈ പുസ്തകം തീര്‍ച്ചയായും നിങ്ങള്‍ക്ക് ഉപകരിക്കും.
diary, notice, letter, news report, profile, conversation, speech, essay തുടങ്ങിയ വ്യവഹാരരൂപങ്ങള്‍ നിശ്ചിത നിലവാരത്തില്‍ തയ്യാറാക്കാനുള്ള നിര്‍ദേശങ്ങളും സഹായങ്ങളും നിങ്ങള്‍ക്ക് ഇതില്‍ നിന്നും ലഭിക്കും. ഖണ്ഡികകളും കവിതാഭാഗങ്ങളുമൊക്കെ വായിച്ച് ഉത്തരങ്ങളെഴുതാനും ഭാഷ നന്നായി പ്രയോഗിക്കുവാനും ഈ സഹായി നിങ്ങള്‍ക്ക് കൈത്താങ്ങായി മാറും.
പുസ്തകം കിട്ടാത്തവര്‍ക്ക് വലതുവശത്തുള്ള ലിങ്കില്‍നിന്നും ഡൗണ്‍ലോഡ് ചെയ്യാം ; വായിക്കാം...
 

'ലേസര്‍' പരിശീലനം

ഐ. ടി @ സ്കൂളിന്റെ സാങ്കേതികസഹായത്തോടെ ഡയറ്റ് കാസര്‍ഗോഡ് നടപ്പിലാക്കുന്ന 'ലേസര്‍' പദ്ധതിയില്‍  ഉള്‍പ്പെടുത്തിയിട്ടുള്ള സ്കൂളുകളിലെ അധ്യാപകര്‍ക്കുള്ള പരിശീലനം ആരംഭിച്ചു. ഡയറ്റ് ലക്ചറര്‍ സുരേഷ് കൊക്കോടിന്റെ സ്വാഗതത്തോടെ പരിപാടിക്ക് തുടക്കമായി.

 ഡയറ്റ് ലക്ചറര്‍ ഡോ. രഘുറാം ഭട്ട് പദ്ധതി വിശദീകരിച്ചു. തുടര്‍ന്ന് സ്കൂളുകളില്‍ നിലവില്‍ നടന്നു വരുന്ന ശാസ്ത്രപഠനത്തില്‍ എത്രകണ്ട് പരീക്ഷണങ്ങളും ഐ. ടി. സാധ്യതകളും പ്രയോജനപ്പെടുത്താനാവുന്നുണ്ടെന്ന വിലയിരുത്തല്‍ നടന്നു.

അടുത്ത സെഷനില്‍ ഏഴാം തരത്തിലെ 'പുളിയുടെ ശാസ്ത്രം' എന്ന പാഠത്തില്‍ എവിടെയൊക്കെയാണ് ഐ. ടി. സഹായം ആവശ്യമെന്ന് അധ്യാപകര്‍ കണ്ടെത്തി. സീനിയര്‍ ലക്ചറര്‍ പി.വി.പുരുഷോത്തമന്‍ ചര്‍ച്ചകള്‍ക്ക് നേതൃത്വം നല്‍കി.
തുടര്‍ന്ന് ഈ പാഠഭാഗത്തെ ആസ്പദമാക്കി തയ്യാറാക്കിയ e-TM ഗ്രൂപ്പുകളില്‍ പരിശോധനയ്ക്കു വിധേയമാക്കി. അധ്യാപകര്‍ മുന്നോട്ടുവെച്ച മാറ്റങ്ങള്‍ പലതും അംഗീകരിക്കപ്പെട്ടു. അതുപ്രകാരമുള്ള മാറ്റങ്ങള്‍ വരുത്തി. ഐ.ടി.സാമഗ്രികള്‍ക്ക് അവസാനരൂപം നല്‍കാന്‍ ഐ.ടി @ സ്കൂളിലെ അധ്യാപകരായ ശങ്കരന്‍, രാജന്‍, ബാബു എന്നിവര്‍ സഹായിച്ചു. തുടര്‍ന്ന് പ്രയാസമുള്ള പരീക്ഷണങ്ങള്‍ ചെയ്യുന്ന സെഷനായിരുന്നു. ഡി.ആര്‍.ജി മാരായ ജനാര്‍ദ്ദനന്‍, നാരായണന്‍ എന്നിവരുടെ നേതൃത്വത്തില്‍ കാസര്‍ഗോഡ് ഗവ. ഗേള്‍സ് ഹയര്‍ സെക്കന്ററി സ്കൂളിലാണ് ലാബ് അനുഭവങ്ങള്‍ ഒരുക്കിയത്.

 

കിനാവ് - 2013

ഡയറ്റ് ലാബ് സ്കൂള്‍ വിദ്യാര്‍ഥികള്‍ക്കായി പ്രീ സര്‍വീസ് ട്രെയിനികളുടെ നേതൃത്വത്തില്‍ നടന്ന ദ്വിദിന സഹവാസക്യാമ്പ് , കിനാവ് - 2013 ഏറെ ശ്രദ്ധേയമായി. 2013 ഡിസംബര്‍ 21,22 തീയതികളില്‍ നടന്ന ക്യാമ്പിന്റെ ഉദ്ഘാടനം നിര്‍മ്മല്‍ കാറടുക്ക നിര്‍വഹിച്ചു. പി. ടി. എ. പ്രസിഡന്റ് മുഹമ്മദ് മായിപ്പാടി അധ്യക്ഷത വഹിച്ചു. ക്യാംപ് കോര്‍ഡിനേറ്റര്‍ എം. വി. ഗംഗാധരന്‍ വിശദീകരണം നടത്തി. സീനിയര്‍ ലക്ചറര്‍മാരായ ഡോ. പി. രാജന്‍, എം. ജലജാക്ഷി എന്നിവര്‍ ആശംസകള്‍ നേര്‍ന്നു. രണ്ടാം വര്‍ഷ അധ്യാപകവിദ്യാര്‍ഥികളായ മഷൂദ സ്വാഗതവും നസീമ നന്ദിയും പറഞ്ഞു.

NEET-UG/2012 ഓണ്‍ലൈന്‍ കറക്ഷന്‍

NEET-UG/2012 ന് അപേക്ഷിച്ചവര്‍ക്ക് അവരുടെ അപേക്ഷയില്‍ എന്തെങ്കിലും തിരുത്തുകള്‍ ആവശ്യമുണ്ടെങ്കില്‍ അതിനുള്ള ഒരവസരം ലഭ്യമാക്കിയിരിക്കുന്നു. 2013 ഫെബ്രുവരി 1 മുതല്‍ 28 വരെ ഇതിനുള്ള അവസരം www.cbseneet.nic.in. എന്ന വെബ്സൈറ്റില്‍ ലഭ്യമാകും. അയച്ച അപേക്ഷയുടെ നിജസ്ഥിതിയും 2013 ജനവരി 15 മുതല്‍ ഇതേ സൈറ്റില്‍ ലഭ്യമാകും.

മദ്രസാ അധ്യാപക പരിശീലനം

കേന്ദ്ര സര്‍ക്കാര്‍ പദ്ധതി പ്രകാരം മദ്രസകളെ നവീകരിക്കുന്നതിന്റെ ഭാഗമായി കാസര്‍ഗോഡ് ജില്ലയിലെ മദ്രസാ അധ്യാപകര്‍ക്കുള്ള പരിശീലനം നടന്നു. ബേക്കല്‍ ബി. ആര്‍. സി. യില്‍ നടന്ന പരിശീലനത്തില്‍ ഇരുപതോളം അധ്യാപകര്‍ പങ്കെടുത്തു. 1 മുതല്‍ 10 വരെയുള്ള സ്കൂള്‍ വിഷയങ്ങളില്‍ കുട്ടികളെ സഹായിക്കുന്നതിനുള്ള പരിശീലനമാണ്  പ്രത്യേകസ്കീം അനുസരിച്ച് അടുത്തിടെ നിയമിതരായ അധ്യാപകര്‍ക്ക് നല്‍കിയത്. ഡയറ്റിനായിരുന്നു പരിശീലനച്ചുമതല.

ജില്ലയിലെ പരിശീലനത്തിന്റെ ഉദ്ഘാടനം ഡയറ്റ് പ്രിന്‍സിപ്പല്‍ സി.എം. ബാലകൃഷ്ണന്റെ അധ്യക്ഷതയില്‍ ഡി. ഡി. ഇ. ശ്രീകൃഷ്ണ അഗ്ഗിത്തായ നിര്‍വഹിച്ചു. എ. ഇ. ഒ. രവിവര്‍മന്‍, ബി പി. ഒ. വസന്തന്‍ എന്നിവര്‍ ആശംസകള്‍ നേര്‍ന്നു. ഡയറ്റ് ഫാക്കല്‍ട്ടി ​അംഗങ്ങള്‍, ഡി. ആര്‍. ജി. മാര്‍ തുടങ്ങിയവര്‍ ക്ലാസെടുത്തു.

സ്കൂള്‍ കുട്ടികള്‍ക്ക് ഏകീകൃത തിരിച്ചറിയല്‍ രേഖ (UID)

കേരളത്തിലെ മുഴുവന്‍ സ്കൂള്‍ കുട്ടികള്‍ക്കും ഏകീകൃത തിരിച്ചറിയല്‍ കാര്‍ഡ് ലഭ്യമാക്കുന്നതിനുള്ള പ്രവര്‍ത്തനങ്ങള്‍ ആരംഭിച്ചിരിക്കുന്നു. അടുത്ത അധ്യയനവര്‍ഷം മുതല്‍ വിദ്യാര്‍ഥികളുടെ സ്കോളര്‍ഷിപ്പ്, ഗ്രാന്റ്, വിവിധ സര്‍ട്ടിഫിക്കറ്റുകള്‍, മത്സരങ്ങളിലേക്കുള്ള എന്‍ട്രി തുടങ്ങിയ പല കാര്യങ്ങളും UID യുടെ അടിസ്ഥാനത്തിലാണ് നിര്‍വഹിക്കപ്പെടുക എന്നതിനാല്‍  മുഴുവന്‍ കുട്ടികള്‍ക്കും അടിയന്തിരമായി ഏകീകൃത തിരിച്ചറിയല്‍ നമ്പര്‍ നല്‍കേണ്ടതുണ്ട്. അധ്യാപക പാക്കേജ്, വിദ്യാഭ്യാസ അവകാശനിയമം തുടങ്ങി മറ്റനേകം കാര്യങ്ങള്‍ക്കും UID ആവശ്യമാണ് എന്നതിനാല്‍ സമയബന്ധിതമായും തെറ്റുകൂടാതെയും UID നല്‍കുന്ന പ്രവര്‍ത്തനങ്ങള്‍ പൂര്‍ത്തീകരിച്ചേ പറ്റൂ എന്ന സ്ഥിതിവിശേഷം സംജാതമായിരിക്കുന്നു.

സ്കൂള്‍ കുട്ടികള്‍ക്ക് UID നല്‍കുന്നതിനുള്ള പൊതുചുമതല ഐ. ടി. @ സ്കൂളിനാണ്. സ്കൂളിലെത്തി UID പ്രവര്‍ത്തനങ്ങള്‍ നിര്‍വഹിക്കുന്നതിനുള്ള ചുമതല അക്ഷയ, കെല്‍ട്രോണ്‍ എന്നീ ഏജന്‍സികളെ ഏല്‍പിച്ചിട്ടുണ്ട്. കാസര്‍ഗോഡ് ജില്ലയില്‍ ഓരോ പ്രദേശത്തും ഈ ചുമതല ഏത് ഏജന്‍സിക്കാണെന്ന് കാണിക്കുന്ന പട്ടികയ്ക്ക് താഴെ ക്ലിക്ക് ചെയ്യാവുന്നതാണ്.

• UID തയ്യാറാക്കാന്‍ ആവശ്യമായ വിവരങ്ങള്‍ ശേഖരിക്കുന്ന ഏജന്‍സി

ഈ ഏജന്‍സി ബന്ധപ്പെടുന്നതിനനുസരിച്ച് വിവരങ്ങള്‍ ചേര്‍ക്കുന്നതിനുള്ള സൗകര്യങ്ങള്‍ സ്കൂളില്‍ ഒരുക്കേണ്ട ചുമതല സ്കൂള്‍ ഹെഡ് മാസ്റ്റര്‍ക്കാണ്. കുട്ടിയുടെ വിവരങ്ങള്‍ അഡ്മിഷന്‍ രജിസ്റ്ററില്‍ നിന്നും കുട്ടിയുടെ രക്ഷിതാക്കളുമായി ബന്ധപ്പെട്ടും കൃത്യമായി ലഭ്യമാക്കുന്നതിനുള്ള ചുമതല ക്ലാസ് ടീച്ചര്‍ക്കാണ് നല്‍കിയിരിക്കുന്നത് . ഇതെല്ലാം സംബന്ധിച്ച് പൊതുവിദ്യാഭ്യാസവകുപ്പ് പ്രസിദ്ധീകരിച്ചിട്ടുള്ള സര്‍ക്കുലറുകള്‍ക്ക് താഴെ ക്ലിക്ക് ചെയ്യുക.

• 10.12.2012 ന്റെ മാര്‍ഗനിര്‍ദേശങ്ങള്‍
• 02.11.2012 ന്റെ സര്‍ക്കുലര്‍

UID ലഭിക്കുന്ന മുറയ്ക്ക് പ്രസ്തുത വിവരങ്ങള്‍ ബന്ധപ്പെട്ട് വെബ്സൈറ്റില്‍ ചേര്‍ക്കേണ്ട ചുമതല സ്കൂള്‍ ഹെഡ് മാസ്റ്റര്‍ക്കും ക്ലാസ് ടീച്ചര്‍ക്കുമായിരിക്കും. താഴെ ചേര്‍ത്ത ലിങ്കില്‍ ക്ലിക്ക് ചെയ്താല്‍ ബന്ധപ്പെട്ട സൈറ്റില്‍ ലോഗിന്‍ ചെയ്യാവുന്നതാണ്. വിവരങ്ങള്‍ നല്‍കുന്നതുമായി ബന്ധപ്പെട്ട നിര്‍ദേശങ്ങള്‍ തൊട്ടുതാഴെയുള്ള ലിങ്കിലും നല്‍കിയിരിക്കുന്നു. കൂടുതല്‍ സംശയങ്ങള്‍ എന്തുണ്ടായാലും ഐ. ടി. @ സ്കൂള്‍ ജില്ലാ കോര്‍ഡിനേറ്ററെ ബന്ധപ്പെടാന്‍ മടിക്കരുത്.

• UID വിവരം ചേര്‍ക്കുന്നതിനുള്ള വെബ്സൈറ്റ്
• ഈ സൈറ്റില്‍ വിവരങ്ങള്‍ ചേര്‍ക്കുന്നതിനുള്ള മാര്‍ഗനിര്‍ദേശങ്ങള്‍

LASER ശില്പശാല

ശാസ്ത്രപഠനം കൂടുതല്‍ ഫലപ്രദമാക്കാന്‍ ലക്ഷ്യമിട്ടുകൊണ്ട് ഐ. ടി. @ സ്കൂളുമായിച്ചേര്‍ന്ന് കാസര്‍ഗോഡ് ഡയറ്റ് ആവിഷ്കരിച്ച LASER (Learning Advancement in Science through Experiments & educational technology Resources) പദ്ധതിയ്ക്ക് അന്തിമരൂപം നല്‍കുന്നതിനുള്ള ആസൂത്രണശില്പശാലയ്ക്ക് ഐ. ടി. @ സ്കൂള്‍ ജില്ലാ റിസോഴ്സ് സെന്ററില്‍ തുടക്കമായി.
ഐ. ടി. ഫാക്കല്‍ട്ടി അംഗം സുരേഷ് കോക്കോട്ട് സ്വാഗതമാശംസിച്ചു.
ഈ വര്‍ഷം ഏതാനും സ്കൂളുകളില്‍ ട്രൈ ഔട്ട് നടത്തുന്ന 'ലേസര്‍' ഫലപ്രാപ്തി വിലയിരുത്തിയശേഷം അടുത്ത വര്‍ഷം കൂടുതല്‍ സ്കൂളുകളില്‍ വ്യാപിപ്പിക്കുമെന്ന് പദ്ധതി രൂപരേഖ അവതരിപ്പിച്ചുകൊണ്ട് ഡയറ്റിലെ സയന്‍സ് ഫാക്കല്‍ട്ടി ഡോ. രഘുറാം ഭട്ട് സൂചിപ്പിച്ചു.
ശാസ്ത്രപഠനത്തിന്റെ അന്വേഷണാത്മകതയ്ക്ക് കോട്ടം തട്ടാതെ വേണം ഐ. ടി. ഉപയോഗിക്കേണ്ടതെന്ന് ഐ. ടി. ഫാക്കല്‍ട്ടി സീനിയര്‍ ലക്ചറര്‍ പി. വി. പുരുഷോത്തമന്‍ വ്യക്തമാക്കി.
ഐ. സി. ടി. സാമഗ്രികള്‍ ടീച്ചിങ്ങ് മാനുവലില്‍ ലിങ്ക് ചെയ്തുകൊണ്ടുള്ള e-TM, അധ്യാപകര്‍ക്കുള്ള അധികവിഭവങ്ങള്‍, ഹാന്റ് ബുക്കിന്റെയും പാഠപുസ്തകത്തിന്റെയും ഡിജിറ്റല്‍ കോപ്പികള്‍ എന്നിവ ഉബുണ്ടുവിന്റെ സയന്‍സ് റിസോഴ്സസ് ലിങ്ക് വഴി കാണാന്‍ പറ്റുന്ന രൂപത്തില്‍ ഉത്പന്നങ്ങള്‍ തയ്യാറാക്കാമെന്ന് മാസ്റ്റര്‍ ട്രെയിനര്‍മാരായ ശങ്കരന്‍, ബാബു ​എന്നിവര്‍ വിശദീകരിച്ചു.
സി. ഡി. ഉപയോഗിച്ച് അധ്യാപകര്‍ക്കുതന്നെ സ്വയം ഇന്‍സ്റ്റാള്‍ കഴിയുന്ന രൂപത്തില്‍ ഡിജിറ്റല്‍ സാമഗ്രികള്‍ ലഭ്യമാക്കാവുന്നതാണെന്ന് മാസ്റ്റര്‍ ട്രെയിനര്‍ രാജന്‍ അഭിപ്രായപ്പെട്ടു.
ശശിധര, മുരളീധരന്‍, ജനാര്‍ദ്ദനന്‍, ബാലാമണി, ദിലീപന്‍, നാരായണന്‍, രാജീവന്‍, അനൂപ് തുടങ്ങിയവര്‍ ചര്‍ച്ചയില്‍ പങ്കെടുത്തു.
തുടര്‍ന്ന് ഏഴാം തരത്തിലെ 'പുളിയുടെ രഹസ്യം' , 'പാത്രത്തിന്റെ  ശാസ്ത്രം' എന്നീ അധ്യായങ്ങള്‍ പരീക്ഷണങ്ങള്‍, ഐ. സി. ടി. ഉപാധികള്‍, മറ്റു പ്രവര്‍ത്തനങ്ങള്‍ എന്നിവ ഉപയോഗിച്ച് സമയബന്ധിതമായും ഫലപ്രദമായും പഠിപ്പിക്കുന്നതിനുള്ള ടീച്ചിങ്ങ് മൊഡ്യൂളുകള്‍ വികസിപ്പിച്ചു.
ജനവരി ആദ്യവാരത്തില്‍ തെരഞ്ഞെടുക്കപ്പെട്ട സ്കൂളുകളിലെ അധ്യാപകര്‍ക്കുള്ള പരിശീലനം നടക്കും. 2013 ജനവരി 15 മുതല്‍ ഫിബ്രവരി 15 വരെയാണ് സ്കൂള്‍തല നിര്‍വഹണം.